Presión de los neumáticos y altitú.
Esti artículu busca dar respuesta a dos entrugues: ¿inflúi l’altitú (altura dende’l nivel del mar) na presión de los neumáticos de los vehículos?; y, si lo fai, ¿ye tán importante como pa tenela en cuenta a la hora de viaxar en coche? Esa búsqueda de respuestes sirve tamién como escusa pa percorrer dalgunos aspectos del comportamientu del aire. Si lo que necesites son respuestes rápides yá t’anticipo que sí, que l’altitú inflúi, anque non de forma tan importante como pa tenela en cuenta al viaxar en coche peles altures. Pero si lo que te presta ye somorguiate nel tema seya cual seya la respuesta, invítote a seguir lleendo.
Neumáticos. Partes y característiques
Antiguamente les ruedes de los carros yeren de madera y la periferia protexíase con una tira metálica que l’arrodiaba completamente pa evitar el desgaste al contactu col suelu; esa tira metálica llamábase llanta, nome que sigue recibiendo anguaño l’armazón metálicu de la rueda. Cuando apaecieron los primeros vehículos a motor y la velocidá empezó a incrementase fízose necesario ameyorar el contactu de les ruedes col suelu, y poro nació’l neumáticu, una superficie de goma qu’amortigua les irregularidaes del terrenu al tiempu qu’ameyora l’agarre y la estabilidá del vehículu.
Les ruedes de los vehículos tán formaes por dos elementos: la llanta y el neumáticu. La llanta ye, como se dixo enantes, l’armazón metálicu circular que va xuníu a la exa del vehículu. El neumáticu ye la pieza circular de goma qu’arrodia a la llanta. L’aire a presión va conteníu directamente ente la cubierta y la llanta, anque antiguamente zarrábase nuna cámara de goma con forma de toru (de rosquiella) asitiada ente la llanta y la cubierta.
Un porcentaxe pequeñu de la presión sirve pa mantener al vehículu flotando sobre’l colchón d’aire; el restu de la presión aplícase en da-y forma y consistencia al neumáticu. Nun ye lo mesmo inflar les ruedes col vehículu ensin carga que con ella; cuando se carga’l vehículu la presión de los neumáticos xube porque’l pesu tiende a aplastar el neumáticu, comprimiendo al aire que contién. La presión adecuada facilítala’l fabricante teniendo en cuenta’l tipu de vehículu y la carga que pue llevar.
Feches estes consideraciones vamos suponer que tenemos un coche normalín cargáu con una o dos persones y colos neumáticos inflaos a la presión recomendada pol fabricante.
Presión absoluta. El barómetru
Cuando nun espaciu hai presión ye porque hai n’él un gas que la produz. L’ausencia de gas conlleva ausencia de presión; la presión midida nun espaciu ensin gas ye cero (0) cualquiera que seya la unidá de midida que s’emplegue y llámase cero absolutu; nun hai presión más baxa del cero absolutu. Al dir introduciendo gas nesi espaciu la presión dirá tomando valores p’enriba’l cero. La presión que se mide a partir del cero absolutu llámase presión absoluta.
La presión atmosférica ye consecuencia del gas (aire) qu’arrodia la superficie terrestre. Pa midir la presión atmosférica úsase’l barómetru, que ye un aparatu que mide presiones absolutes. Les presiones qu’amuesen los mapes meteorolóxicos son absolutes y usen como unidá de midida el bar o el pascal (Pa), o los sos derivaos milibar (mbar) y hectopascal (HPa).
Cuanto más abaxo tamos somorguiaos nel aire mayor ye la presión qu’ésti produz sobre nosotros. Pel contrariu, cuanto más altos tamos más pequeña ye la capa d’aire y, poro, menor ye la presión qu’exerce sobre nós. A mou d’exemplu, esta ye la presión atmosférica a distintes altitudes: a cero metros d’altura (nivel del mar) ye aproximadamente 1 bar, a 1000 metros ye 0,88 bares, a 1300 metros (puertu Payares) ye 0,85 bar y a 8000 metros (Everest) ye solo 0,33 bares. Na Lluna y nel espaciu esterior, al nun haber prácticamente nengún gas que conforme una atmósfera, la presión barométrica pue considerase nula, ye dicir, 0 bar.
Hai un esperimentu que se pue facer pa observar la diferencia de presión cola altitú; pa ello necesitamos una simple botella de plásticu finu vacía, del tipu de les que s’usen pal agua mineral. Pa que l’esperimentu nun se vea influyíu polos cambios de temperatura ye aconseyable facelu dientro un coche climatizáu a unos 20ºC. L’esperimentu ye d’esta manera: tando al nivel del mar dientro’l coche, zarramos herméticamente la botella; la presión del aire dientro y fuera la botella ye la mesma: 1 bar. Al xubir al altu Payares vamos notar que la botella paez garrar presión, y al abrir el tapón, siempre dientro’l coche, va salir l’aire un poco comprimíu. En realidá l’aire de la botella nun garró presión, lo que pasó foi que la presión del aire fuera la botella fízose más pequeña por mor de l’altitú, creándose un desequilibriu de presiones en favor de la de la botella.
Presión relativa. El manómetru
Cuando midimos la presión de los neumáticos nuna gasolinera usamos el manómetru; esti instrumentu nun mide presiones absolutes como lo fai’l barómetru sinon que mide diferencies de presión; en concreto mide la diferencia ente la presión dientro’l neumáticu y la presión fuera d’él, o seya, l’atmosférica. Por exemplu, si’l manómetru marca 2 bares al nivel del mar, onde la presión atmosférica ye 1 bar, eso quier dicir que la presión absoluta dientro’l neumáticu son 3 bares; el manómetru llee la diferencia 3-1=2bar. Fixaivos que'l monómetru nun “sabe” cuála ye la presión absoluta dientro’l neumáticu nin fuera d’él, solo mide la diferencia.
La presión que proporcionen los manómetros llámase presión relativa, porque depende del valor de la presión esterior.
La presión del neumáticu paez aumentar cola altitú
Vamos suponer que tomamos la presión del neumáticu nuna gasolinera de Xixón y el manómetru marca 2 bares. Vimos enantes qu’esa ye la diferencia ente la presión absoluta del neumáticu (3 bar) y la presión atmosférica al nivel del mar (1 bar). Si facemos esa mesma operación nel altu Payares la presión absoluta del neumáticu sigue siendo la mesma (3 bar), pero la presión atmosférica agora ye más baxa (0,85 bar); poro, la midida del manómetru va ser 2,15 bares, que ye la diferencia ente les dos presiones. Igual qu’asocedía nel esperimentu de la botella d’agua, la presión del neumáticu paez aumentar ente Xixón y el Payares, pero en realidá lo qu’asocede ye que la presión atmosférica disminúi y, poro, tamién lo fai la diferencia que mide’l manómetru.
La presión del aire baxa cola temperatura.
Pa observar esti fenómenu podemos facer otru esperimentu cola botella d’agua de plásticu. Al zarrar la botella dientro l’habitación recoyemos nella una porción d’aire qu’enllena’l so interior y que ta a la mesma presión que l’aire de l’habitación. Metiendo la botella nel conxelador y sacándola al cabu d’una hora veremos que sal arrugada; ello ye porque al enfriar el aire de la botella baxó la so presión y prodúxose un desequilibriu en favor de la presión del aire de la habitación.
Esta disminución de la presión pol efectu de la temperatura súfrela tamién l’aire del neumáticu al xubir a les altures. Estímase que por cada 1000 metros d’altitú baxa la temperatura unos 6,5 ºC y con ello baxa tamién la presión del neumáticu. Ente Xixón y l’altu Payares la presión manométrica del neumáticu baxaría pol efectu de la temperatura de 2 a 1,94 bar.
Conclusión
Tamos entós ante dos fenómenos que se compensen cola altitú: per un llau baxa la presión atmosférica y produzse un desequilibriu en favor de la presión del neumáticu; y per otru llau baxa la presión del neumáticu y desequilíbrase en favor de l’atmosférica, y anque la compensación nun ye del too exacta sí ye lo suficiente como pa que, inflaos los neumáticos a la presión correcta indicada nel manual del vehículu, nun nos tengamos que preocupar d’ella cuando viaxamos a les altures.
Ochobre 2025
