Diferencies ente l'horru y la panera

DIFERENCIES ENTE L’HORRU Y LA PANERA. Efrén d’Andrés 

L’horru ye una construcción que se pon enriba pegollos y que s’usa pa guardar embutíu, granu o fruta. L’oxetu de los pegollos ye mantener al horru aislláu de los ratones y de la humedá del suelu. N’Asturies hai munchos horros, unos 15.000, pero tamién se puen ver horros en Galicia, Cantabria, País Vascu y n’otres partes del mundu como Turquía, Noruega o Australia. 

Atendiendo a la forma de la planta n’Asturies distínguense dos tipos d’horros. El primer tipu tien planta cuadrada y llámase ‘horru’, igual que’l so nome xenéricu. El segundu tipu tien planta rectangular y llámase ‘panera’. 

Tanto l’horru como la panera tienen teyaos a cuatro agües de la mesma pendiente (son escepción los horros de la zona de Ponga, con teyáu a dos agües). Como l’horru tien la planta cuadrada, el teyáu toma forma de pirámide regular (como les d’Exiptu), con base cuadrada y cuatro agües triangulares y iguales. El cumal del teyáu ye un puntu o vértiz que se remata con un moñu. Como la panera tien la planta rectangular, les agües de los llaos llargos tomen forma de trapeciu y el cumal acaba nuna arista que se remata con dos moños, unu en cada estremu de l’arista. El llargor de l’arista (o, si se prefier, la distancia ente los moños) ye la diferencia ente’l llau llargu y el curtiu de la planta rectangular. 

Atendiendo al númberu de pegollos l’horru tien cuatro, llantaos unu en cada esquina de la planta cuadrada. La panera tien seis o más pegollos, llantaos cuatro d'ellos nes esquines de la planta rectangular y el restu intercalaos equidistantes nos llaos llargos evitando vanos pergrandes. Nun convién recurrir al númberu de pegollos pa establecer la diferencia ente estes dos construcciones porque, si bien l’horru naz con cuatro, pue dir necesitando pegollos adicionales al dir cediendo les trabes col pesu y el pasu de los años; así, ye normal ver horros vieyos con cinco, seis o más pegollos. Puen atopase tamién horros ñacíos de mano con más de cuatro pegollos, o paneres de solo cuatro, pero estos son casos escepcionales que nun desvirtúen el canon xeneral. 

Resumiendo, la forma de la planta ye lo que marca la diferencia ente horru y panera: horru planta cuadrada y panera planta rectangular; como consecuencia d’ello l’horru tien un moñu y la panera tien dos, lo qu’ayuda a distinguilos si la forma de la planta nun ye evidente. 

En tou casu, si un día, caleyando pela Asturies eterna, nos atopamos con una construcción enriba unos cuantos pegollos y nun tamos seguros de si ye horru o panera, siempre acertaremos diciendo que ye un ‘horru’. 

Efrén d’Andrés Setiembre de 2025